Sunday, January 3, 2016

ඉතිහාසය කනපිට හැරවූ සහශ්‍රකයේ මහා දාර්ශනිකයා


සුවිශේෂී හැකියාවන් හා ගුණාංග රාශියක එකතුවක් වූ මිනිසෙකුට හැර , පවත්නා සම්මත බල රටාවන්ට අභියෝග කල නොහැක. පවතින අධිපතිවාදී ජනපීඩක පාලන ක්‍රමය වෙනුවට වඩා යහපත් හෙට දවසක් මානව වර්ගයා වෙනුවෙන් ගොඩනැගීමේ උත්තුංග කර්තව්‍යට උරදීමට ඉදිරිපත් වීම ද පහසු කටයුත්තක් නොවේ. එවන් මිනිසුන් පිළිබඳව ඉතිහාස වංශ කතාව තුල, අනාගත පරපුරට ආඩම්බරයෙන් කතා කිරීමට ඉතිරි වී ඇත්තේ අතලොස්සකි.

මේ එවන් විශ්වීය චරිතයක් ගැන කෙටි විවරණයකි

ගෙවී ගිය සහසක්‍රයේ සිට විශිෂ්ටතම චින්තකයා ලෙස සැලකෙන්නේ කවුරුන්ද යන පැනය ඉදිරිපත් කරමින් 1999 සැප්තැම්බර් මස බී. බි. සි. ප්‍රවෘත්ති "ඔන් ලයින්" සේවය විසින් පවත්වන ලද ඡන්ද විමසීමේදී පළමු ස්‌ථානය හිමිවූයේ කාල්මාක්‌ස්‌ටය. දෙවැනි, තුන්වැනි සහ හතරවැනි ස්‌ථාන හිමිවූයේ පිළිවෙළින් ඇල්බට්‌ අයින්ස්‌ටයින්, අයිසැක්‌ නිව්ටන් සහ චාල්ස්‌ ඩාවින්ටය. 2005 වසරේ ඩී. බී. සී. ගුවන්විදුලිය, 4 විසින් ලොක්‌යේ ඉකුත් සියවසේ විසූ විශිෂ්ටතම දාර්ශනිකයා කවුරුන්දැයි විමසූ ඡන්දයේ දී ද පළමු ස්‌ථානය හිමිවූයේ කාල් මාකස්‌ටය.

විද්‍යාත්මක සමාජවාදයේ නිර්මාතෘ කාල්මාක්‌ස්‌ 1818 මැයි මස 05 වැනිදා ජර්මනියේ ට්‍රීර් නගරයේදී උපත ලැබුවේය. ඔහුගේ පියා නීතිවේදියකුවූ හෙන්රිශ් මාක්‌ස්‌ විය. මව ඕලන්දයේ උපත ලැබූ හෙන්රි යට්‌ටා නම්විය. 1835 වන තෙක්‌ මාක්‌ස්‌ ට්‍රීර් නගරයේ දී මූලික අධ්‍යාපනය ලැබුවේය. පසුව බොන් විශ්වවිද්‍යාලයේ නීති විද්‍යා අංශයට ඇතුළු විය. මාක්‌ස්‌ වැඩි වශයෙන් දර්ශනවාදය, ඉතිහාසය හා විද්‍යා විෂයන් පිළිබඳ දැඩි උනන්දුවක්‌ දැක්‌වූවේය. නිර්මාණශීලී සාහිත්‍ය සඳහා ද බොහෝ කාලයක්‌ මිඩංගු කළේය. දැනීම ලබා ගැනීම සඳහා නොසිඳෙන පිපාසයක්‌ද, ගැඹුරු ලෙස සත්‍ය සෙවීමද, තම කටයුතු පිළිබඳව ස්‌වයං විවේචනයද අරගලකාරී හා සටන්කාමී ජීව ගුණයද, තරුණ කාල්මාක්‌ස්‌ සතු විය. 18 වැනි ශත වර්ෂය අවසානයේ බ්‍රිතාන්‍යයේ ඇතිවූ කාර්මික විප්ලවයෙන්පසු යුරෝපා රටවල පැවැති රදල සමාජ සම්බන්ධතාවන්ගේ නටඹුන් බිඳ වැටීමට පටන්ගත් අතර, කාර්මික විප්ලවය යුරෝපා මහාද්වීපය පුරා ව්‍යාප්තවීම ආරම්භ විය. මහා ධනපති කර්මාන්ත සංවර්ධනයක්‌ සමඟ ගොවීහු සහ හස්‌ත කර්මාන්ත ශිල්පියෝ නිෂ්පාදන මාධ්‍යයන්ගේ කිසිවක්‌ අයිති නැති අනුකම්පා විරහිත සූරා කෑමට භාජනය වූ කුලී වැටුප් ලබන කම්කරුවන් බවට පරිවර්තනය වූහ. ඓතිහාසික සිද්ධීන් මුහුකුරා වැඩුණු එවැනි තත්ත්වයක්‌ තුළදී මාක්‌ස්‌ගේ මත සකස්‌ විය. යුරෝපා රටවල ධනවාදය තහවුරුවීම මගින් පන්ති අරගලය උග්‍රවීමටද, ධනපති ප්‍රජාතන්ත්‍රවාදී සහ ජාතික විමුක්‌ති ව්‍යාපාරවල පුළුල් ව්‍යාප්තවීමකට ද, ධනපති ක්‍රමයට විරුද්ධව නැඟී සිටින්නාවූ නිර්ධන පංතියක්‌ ඓතිහාසික කරළියෙහි පෙනී සිටීමකටද, මං පාදමින් කම්රු නැගිටීම් වර්ධනය විය.

පීඩිත ජනතාව

1841 අප්‍රේල් මාසයේදී කාල් මාක්‌ස්‌ට දර්ශනවාදය පිළිබඳව ආචාර්ය උපාධිය හිමි විය. වැඩකරන ජනතාවගේ ජීවිතයේ ද්‍රව්‍යමය සහ ආර්ථික ප්‍රශ්න කෙරහි ගැඹුරු උවමනාවක්‌ දැක්‌වූ මාක්‌ස්‌ ඒ වනවිට පැවැති මනෝරාජිත කොමියුනිස්‌ට්‌වාදී අදහස්‌ පිළිබඳව පිරික්‍ෂා බැලුවේය. විද්‍යාව යටපත්කර ගැනීමට ආගම දැරූ සියලුම ප්‍රයත්න වලට සහ මිනිස්‌ විඥානය බැඳ තැබීමට ඉදිරිපත්වූ සියලුම ප්‍රයත්නවලට විරුද්ධව මාක්‌ස්‌ නැඟී සිටියේය. අහසේ සහ පොළොවේ සිටින සියලුම දෙවිවරුන්ට විරුද්ධව යුද්ධ ප්‍රකාශ කරන මාක්‌ස්‌ සටන්කාමී අදේවවාදියකු හා විප්ලවවාදියකු ලෙස පෙනී සිටියේය.

ලෝකයේ පීඩනයට පත්ව සිටින ජනතාව එයින් මුදා ගැනීමේ විද්‍යාත්මක දර්ශනයක්‌ සකස්‌ කිරීම සඳහා තම ජීවිතය කැප කළ කාල්ස්‌ මාක්‌ස්‌ ස්‌වකීය ද්‍රව්‍යවාදී දෘෂ්ටිය පදනම් කර ගත් ඔහුගේ න්‍යාය ජනතාවට පසක්‌ කරගත හැක්‌කේ එම න්‍යායෙන් ඔවුන්ගේ ඉතා වැදගත් අවශ්‍යතාවන් සහ ප්‍රධාන අයිතිවාසිකම් පිළිබිඹු වුවහොත් පමණකියි යන චින්තනය වර්ධනය කළේය.

සමාජවාදී න්‍යාය

මාක්‌ස්‌ගෙන් මානව වර්ගයාට සිදුවූ අගනා සේවය වන්නේ වැඩ කරන ජනතාවගේ ඓතිහාසික විමුක්‌තිකාමී කාර්යභාරය අරඹයා ප්‍රඥාව හා සංකල්පය සමාජවාදය මනෝරාජිත තත්ත්වයක සිට විද්‍යාවක්‌ දක්‌වා පරිවර්තනය කිරීමයි. වැඩි වැඩියෙන් පෑගී සිටින පංතියට සිය ජීවිතය කැප කළ මාක්‌ස්‌ට තමන්ගේ අදහස්‌වලට සම්පූර්ණයෙන්ම කැපවූ විශ්වාසවත් මිතුරකු වූ පෙඩ්රික්‌ ඒංගල්ස්‌ගේ සහයෝගය ලැබුණි.

කාල්මාක්‌ස්‌ ජාතීන් සහ ජනවර්ග අතර පැනනගින ප්‍රශ්න පිළිබඳව වැදගත් මූලධර්මයන් සම්පාදනය කළේය. වෙනත් ජාතියක්‌ පාගා සිටින ජාතියක්‌ නිදහස්‌ ජාතියක්‌ නොවන බවත් ජාතීන් අතර සමානාත්මකව හා නිර්දන පන්තියක ජාත්‍යන්තරවාදී මූලධර්මය ජාතීන් හා ජනවර්ග අතර පවත්නා ප්‍රශ්න විසඳීම සඳහා යොදා ගන්නා ප්‍රධාන ප්‍රතිපත්තියක්‌ බවත් එයින් විස්‌තර කරනු ලැබීය. කාල්මාක්‌ස්‌ හා පෙඩ්රික්‌ ඒංගල්ස්‌ ලියා පළ කළ "කොමියුනිස්‌ට්‌ පක්‍ෂයේ ප්‍රකාශනය" මගින් මාක්‌ස්‌ගේ ඉගැන්වීම්වල සංයුක්‌ත කොටස්‌ තුන වූ දර්ශනවාදය, දේශපාලන ආර්ථික විද්‍යාව, විද්‍යාත්මක සමාජවාදය, පිළිබඳ විස්‌තර කළේය. කම්කරු පංතිය විද්‍යාත්මක විප්ලවාදී න්‍යායකින් සන්නද්ධකොට වැඩ කරන ජනතාවගේ ස්‌වාධීන පක්‍ෂයකට අවශ්‍ය උපාය සහ උපක්‍රමවල පදනම දැමුවේද මාක්‌ස්‌ සහ ඒංගල්ස්‌ විසිනි. තම ඉගැන්වීම් ලෝකයේ වෙනස්‌ කිරීමේ අවිය ලෙස ගැලපූ මාක්‌ස්‌, සමාජවාදය කම්කරු පංති ව්‍යාපාරය සමඟ ඒකාබද්ධ කිරීමටත්, ධනපති සමාජ ක්‍රමය වෙනුවට විද්‍යාත්මක සමාජවාදී ක්‍රමය ඉදිකිරීමේ ඓතිහාසික කාර්යභාරය බාරව සිටින නිර්ධන පංතිය තම න්‍යායයෙන් සන්නද්ධ කිරීමටත් ක්‍රියා කළේය.

අධික වේගයකින් මොළය වෙහෙසා වැඩ කිරීම හා ආර්ථික අමාරුකම්වලට මුහුණපෑම නිසා දිනෙන් දින මාක්‌ස්‌ගේ ශරීර සෞඛ්‍ය තත්ත්වය කලක්‌ සිටම පිරිහෙන්නට විය. මේ අතරතුර මාක්‌ස්‌ගේ බිරිඳ රෝගාතුරවීම ඔහුට ඇති බරපතල පහරක්‌ විය. 1881 දෙසැම්බර් මාසයේ 02 වැනිදා මාක්‌ස්‌ගේ බිරිඳ ජෙනී මිය ගියේය. 1883 පෙබරවාරි මාසයේ මාක්‌ස්‌ගේ රෝගී තත්ත්වය උත්සන්නවී ඔහුගේ ශක්‌තිය වේගයෙන් දුර්වලවන්නට විය. මාර්තු 14 වැනිදා දහවල් 02.45 ට පමණ හාන්සි පුටුවේ වාඩිවී සිටියදීම මාක්‌ස්‌ සදහටම නිහඬ විය. මාක්‌ස්‌ අවසන් කාලයේ ජීවත් වූ ලන්ඩන් නගරයේ පිහිටි හයිගේට්‌ සුසාන භූමියේ ඔහුගේ බිරිද වූ ජෙන් මිහිදන් කර තිබූ ස්‌තානයේම මාර්තු 17 වැනිදා මාක්‌ස්‌ගේ මෘතදේහය මිහිදන් කරන ලදී. එහිදී ඔහුගෙන් සමු ගනිමින් කථා කළ මාක්‌ස්‌ගේ කල්‍යාණ මිත්‍රයා වූ ඒංගල්ස්‌ තම මිතුරාගේ යෝධමය කටයුතු ගැන විස්‌තර කළේය. ඒවා අතර ඉතා විශේෂ ස්‌ථානයක්‌ හිමි වූයේ සැබවින්ම මාක්‌ස්‌ගේ ශ්‍රේෂ්ඨතම සොයා ගැනීමක්‌ වූ මිනිස්‌ ඉතිහාසයේ සංවර්ධනය පිළිබඳ න්‍යාමය සහ අතිරික්‌ත වටිනාකම පිළිබඳ න්‍යාමය විය. මාක්‌ස්‌ ඉමහත් ප්‍රඥාවෙන් හෙබි චින්තකයකු පමණක්‌ නොව ශ්‍රේෂ්ඨතම විප්ලවාදියා බවත් ඒංගල්ස්‌ එහිදී පැවැසීය. තමාගේ ගුරුවරයා සහ මිතුරාවන මාක්‌ස්‌ගෙන් අවසන් වශයෙන් සමුගත් එංගල්ස්‌ සිය කතාව අවසන් කළේ අනාවැකියකිනි. " මාක්‌ස්‌ගේ නමත්" ඔහුගේ කාර්යභාරයත් ශත වර්ෂ ගණනාවක්‌ පවතිනු ඇත යනු ඒ අනාවැකිය විය.

                                                                 - චූලක බණ්ඩාරවත්ත -

Friday, December 18, 2015

මැරිලින් බක්


මැරිලින් බක් යනු අධිරාජ්‍යවාදීන් ගේ තිඹිරි ගෙය තුල ඉපිද එයට එරෙහිව දැවැන්ත සටනක් ගෙන ගිය ඇමෙරිකානු කාන්තාවකි. 1947 දෙසැම්බර් 13 වනදා ඇය උපත ලද්දේ ටෙක්සාස් ප්‍රාන්තයේ මිඩ්ලන්ඩ් හිදීය. 1960 දී සරසවි අධ්‍යාපනය හදාරන සමයේදී මරිලින් ගේ ප්‍රගතිශීලී අදහස් මෝරා වැඩෙන්නට විය . වියට්නාමය තුල සිදු කල ඇමෙරිකානු අමානුෂික යුද්ධයට එරෙහිව ගොඩනැගුනු ප්‍රජාතන්ත්‍රවාදී සමාජයක් උදෙසා වූ ශිෂ්‍ය සංවිධානයට බැඳී එහි ප්‍රබල ක්‍රියාකාරිනියක් විය. අනතුරුව පලස්තීනයට නිදහස වෙනුවෙන් වූ අරගලය තුලද , ඇමෙරිකානු වර්ගවාදයට එරෙහි අරගලය තුලද මරිලින් කැපී පෙනෙන චරිතයක් විය. 1970 වන විට ඇයගේ දේශපාලන දැක්ම වෙනස් වෙමින් දැඩි කොමියුනිස්ට්වාදිනියක් විය. ඇමෙරිකාව තුල එවකට ක්‍රියාත්මක වූ කළු ජාතික විමුක්ති ව්‍යාපාරයට සම්බන්ද වී එහි සන්නද්ධ අංශය වූ Black Panther Army හි උද්වෙගවත් ක්‍රියාකාරිනියක් විය. 1973 දී වෙඩි බෙහෙත් මිලදී ගැනීමේ සිද්ධියකට වැරදිකාරිනියක් වීමෙන් දසවසරක සිර දඬුවමක් නියම විය. නමුත් 1979 දී ඇය සිරගෙදර බිඳ පලාගිය අතර අනතුරුව රහසිගත දේශපාලනයක නිරත විය. එමකාලය තුල ඇමෙරිකානු සෙනෙට් මන්ධිරයට එල්ල කල සන්නද්ධ ප්‍රහාරයේ මුල් පෙලේ ක්‍රියාකාරිනියක් විය. එම සිදුවීමට ඇය අත්අඩංගුවට පත් වන්නේ 1985 දීය.
 
1985 සිට 2010 දක්වාම ඇමෙරිකාවේ ටෙක්සාස් බන්ධනාගාරයේ කුඩා සිර මැදිරියක ඇයගේ භෞතික ශරීරය පමණක් සිර කර තැබිය. බන්ධනාගාරයේ උසම උස තාප්ප වලට අයගේ අධිෂ්ඨානයත් , සටන්කාමිත්වයත් කොටු කර තැබීමට අසමත් විය. 2010 අගෝස්තු මස 3 වන දින බන්ධනාගාරය තුල මිය යනතුරුම ඇයගේ පන්හිඳ කගපතක්ම විය. තම දේශපාලන අදහස් කවියෙන් මුදාහල අතර , ඒවා ඇමෙරිකානු පීඩිත ජන සමාජය අතර මෙන්ම ලොව පුරා ප්‍රගතිශීලී අදහස් දරන ජනී ජනයාගේ නොමද පැසසුමට ලක්විය. මනෝ විද්‍යාව පිළිබඳව B A උපාධියක්ද , කාව්‍යකරණය පිළිබඳව M A උපාධියක්ද හිමි ඇය උගන්ඩා ජාතික සමාජවාදී කිවිඳියක වූ පෙරී රෝසිගේ "පිටුවහළේ සිට " කාව්‍ය සංග්‍රහය ඉංග්‍රීසි හා ස්පාඤඤ භාෂාවට පරිවර්තනය කළේය. මරිලින්ගේ කවි ඇමෙරිකානු PEN ආයතනයෙන් දුන් සම්මාන තුනකින් පිදුම් ලැබුවාය.
 
මැරිලින් බක් විසින් රචිත " වන පොපි කුසුම " නම් කවියේ සිංහලානුවාදයයි මේ...
 
මගේ මතක අතරෙහි රැඳී ඇත තවම - 
රතුම රතු පොපි කුසුම 
තක්සලාව පිටුපස නිදැල්ලේ මුකුලිත වුණ 
අවැසි නොවී මට එහි යාමට 
එදා ලොල්වීම මා බෝ සේ ඒ දකිනට -
ඇබ්බැහිව සිටියෙමි...
සිත්තම් කරමින් තුරු ලතා ඉඳි 
මගේ කුටියේ කවුළුව ළඟ 
සිදුවීද කුමක් නම් ...? 
ඒ මැග්නෝලියා තුරු වදුලට 
අනේ ඒ දැරියට ....
පියමැන්නෙමි තක්සලාවට 
මිදී මා පියාගේ අසනී වර්ෂාවෙන් 
කැරලි ගැසුවෙමි ප්‍රභාවෙන් මත්වුනෙමි 
වියට්නාම් සංග්‍රාමය ..කළු බලය ..චේ
රැගෙන ගියෙමි මා චිකාගෝ වෙත 
කළු ජාතිකයින්ට වෙන්වූ අපේ නගරයට 
මැදියම් රෑ අඳුර අතරින් 
අධිෂ්ඨානයේ අතුල් පහර ලදිමි
කැලිෆෝනියාවට ගියෙමි හිමිදිරි උදයක 
කඳු අතර සැරිසැරුවෙමි 
උගතෙමි කිමද අධිෂ්ඨානයේ අරුත ...
හදපත්ලෙන්ම වටහා ගත්තෙමි 
ඒ නම් සුදු තරුණියක සිත බියපත් කරවන්නෙකි 
විඳිමි මගේ ඔදතෙද - භාවිතය ප්‍රබලය
අනතුරව 
සැන් ප්‍රන්සිස්කෝහි පුල්ටන් වීදියේ 
පියගැට පෙළ මත තොල ගාමින් බියර් 
බ්ලැක් පැන්තර් වරුන් සුදු හිපියන් සමග 
සංවාද කලෙමි නිබඳව 
එන දිනය පිලිබඳ විප්ලවය 
අපි බලා සිටියද කොතෙක් ...
විප්ලවය නොපැමිණියද 
ප්‍රේඩ , බෙනට් අතුරුදන් වුනි 
පසුව උන් හමු වුනු බව ඇසීමි 
අළු , ඇටකටු හා මගුල් මුදුවක් සමග 
පසුව අප 
විමුක්තියේ අකාස්මික මදහස දුටිමි...
ඉදින් මාගේ වාරයද එළඹුණි 
කටුක වදයෙන් පිරි 
ජරපත් සිපිරි කුටියක 
මාද රඳවන ලදිමි...
ජීව ගුණය සිඳී යනයුරු අත්දුටිමි 
ඒ ද මේ අනේකවිද අතවරයන් මැදය 
දිවි ගලවා ගැනීමට වරම් ලදිමි 
ඔව් මම දිවි රැකගතිමි 
ඉනිදු නොනැවතී මමද 
මේ මිහිමව් ලමැදට මුල් ඇදුනි
සවිමත් තණ පඳුරක් සේ වීමි 
රතුම රතු පොපි කුසුමක් වීමි 
ඉදින් හදපුරා ඒ ගැන තුටු වීමි..


                                                          - චූලක බණ්ඩාරවත්ත -

Tuesday, December 15, 2015

මානව පරිණාමය - Human Evolution

මිහිතලය මත ජීවය පහළවීම පිළිබඳ ඇත්තේ විවිධාකාර වූ මතවාදයන්ය. එම මතවාද හුදෙක්‌ විශ්වාසය මෙන්ම තාර්කිකත්වය මත මානව විද්‍යාඥයන් සනාථ කළ කරුණ නම්, මිහිතලය මත එක්‌ එක්‌ පියවරන් අනුව ජීවය හටගත් බවයි. එහෙත් නාසා ආයතනය ඉදිරිපත් කළ අභිනව මතයකට අනුව පෘථිවියේ ජීවය සම්භවය වූවා නොව වෙනත් ග්‍රහලෝකයකින් පෘථිවිය මතට සංක්‍රමණය වූවා යෑයි ඉදිරිපත් කෙරේ.

 බෞද්ධ දර්ශනය තුළද යම් ස්‌ථානයන්හි ජීවයේ හටගැනීම පිළිබඳ කරුණු අනාවරණය වේ. බුදුන්වහන්සේ අග්ගඤ්ඤ සූත්‍රයේදී අනාවරණය කරනුයේ මිහිමත ජීවයේ ප්‍රභවය සිදුවූයේ ආබස්‌වර නමැති බ්‍රහ්මලොවින් සංක්‍රමණය වූ ජීවයකිනි. මෙලෙස පැමිණි ජීවය පරිසරයට උචිත පරිදි පරිණාමය වන්නට පටන් ගත්හ.


 කෙසේ වෙතත් මිහිමත ජනිත වූ හෝ වෙනත් ග්‍රහලොවකින් සංක්‍රමණය වූහෝ ජීවය මිනිසා බිහිවීම දක්‌වාම අනවරත වෙනස්‌වීම් වලට භාජන විය. මානව පරිණාමය වනාහී යම් තාර්කික ක්‍රමවේදයක්‌ අනුව හා ක්‍රමානුකූලව සිදුවූවක්‌ බව ඒ පිළිබඳ මතවාදයන් ඉදිරිපත් කළ විද්වතුන්ගේ කරුණු අනුව පැහැදිළි වේ.

  
 ඉපැරණි ශිෂ්ඨාචාරයන්ගේ මානව පරිණාමය පිළිබඳ විශ්වාසයන්
 
ඊජිප්තු ශිෂ්ඨාචාරය

 
ඉපැරැණි ඊජිප්තු ශිෂ්ඨාචාරයේ ආදි වැසියන්ගේ ප්‍රධාන ආගමක්‌ වූයේ මළවුන් පිදීමය. ඔවුන්ගේ විශ්වාසය වූයේ මිනිසා සම්බන්ධ ජීවයේ නිමැවුම්කරු වූයේ දෙවියන් වහන්සේ බවය. දෙවියන් වහන්සේ ප්‍රථමයෙන් මැටියෙන් රූප සාදා එම මැටි රූපවලට මුවින් පිඹ ජීවය ලබාදුන් බව ඔවුන්ගේ විශ්වාසයයි.

 
ග්‍රීක ශිෂ්ඨාචාරය

 
ග්‍රීසියේ ඕර්ගික ඇදහිලි ක්‍රමය අනුව ඩයෝනිසස්‌ යනු සියුස්‌ දෙවියාගේ සහ පර්සිපොන් දෙවඟනගේ පුත්‍රයාය. ටයිටන්වරු (යෝධ දෙවිවරු) ඩයෝනීසස්‌ මරා මස්‌ අනුභව කළහ. මෙයට කෝප වූ සියුස්‌ දෙවියා අකුණු සර එවා ටයිටන්වරුන්ව මරා මස්‌ පුලුස්‌සා දමා ඇත. මෙසේ මියගිය ටයිටන්වරුන්ගේ අළුවලින් මිනිසා බිහිවූ බව ඕර්ගික ඇදහිලි වලින් පෙන්වා දෙයි.




 ස්‌වයං සිද්ධි ජනනවාදය
 
මෙම වාදයේ ආරම්භකයා වනුයේ අදින් වසර දෙදහසකට පමණ පෙර ග්‍රීසියේ විසූ මහා දාර්ශනික ඇරිස්‌ටෝටල්ය. ස්‌වයං සිද්ධි ජනනවාදයේ මූලිකම අදහස නම් ජීවය ඉබේම හටගන්නා බවයි. පැටවුන් බිහිකිරීමට අමතරව ශාකවලින් ජීවීන්ගේ උපත සිදුවන බවත් කියවේ. උදැසන පිනි වලින් කෘමීන්ගේ උපත සිදුවීම හා නෙළුම් මල්වලින් හංසයන් ඉපදීම වැනි අදහස්‌ මෙම වාදයේදී ඇරිස්‌ටෝටල් ඉදිරිපත් කරයි. ඇරිස්‌ටෝටල්ගේ මෙම වාදය වසර සිය ගණනක්‌ පිළිගැනීමට ලක්‌විය.

 
ඇරිස්‌ටෝටල්ගේ ස්‌වයං සිද්ධි ජනනවාදය තහවුරු කිරීම පිණිස ක්‍රිස්‌තියානි පූජකවරු ශුද්ධ ලියවිලිවලින් කරුණු දැක්‌වූහ. බයිබලයේ උප්පත්ති කතාවේ සඳහන් ජීව වස්‌තුවල සම්භවය තහවුරු කිරීමට උපයෝගි කරගත් හීබෲ චින්තනය සමඟ ඇරිස්‌ටෝටල්ගේ මෙම වාදය හොඳින් ගැලපුනි.

 
17 වැනි සියවසේදී බෙල්ජියානු වෛද්‍යවරයකු වූ ජීන් බැප්ටිස්‌ ඇරිස්‌ටෝටල් ගේ ස්‌වයං සිද්ධි ජනනවාදය අනුමත කරමින් කරුණු ඉදිරිපත් කළහ. එහෙත් ඔහුගේ මතවාද සහමුලින්ම ප්‍රතික්‍ෂ්ප වනුයේ 1860 දී ප්‍රංශ ජාතික විද්‍යාඥයකු වූ ලුවී පාස්‌චර්ගේ වාදයත් සමඟිනි. ඔහු ඉදිරිපත් කරන අන්දමට යුගයෙන් යුගයට නව ජීවීන් බිහිවන අතර එක්‌ යුගයක පැරැණි ජීවීන්ගේ විනාශය සිදුවී, නව ජීවීන්ගේ ආරම්භය නව යුගයකදී සිදුවේ.



  මානව පරිණාමය පිළිබඳ ආගම්වල අඩංගු දේවල්
 
I ක්‍රිස්‌තියානි ආගම

 
ක්‍රිස්‌තියානි ආගමට අනුව බයිබලයේ උප්පත්ති කතාවේ පළවූ පරිච්ඡේදයේ ජීව වස්‌තූන්ගේ හා එකිනෙකට ඇති වෙනස්‌කම් පෙන්වා දී ඇත්තේ සර්වබලධාරී දෙවියෙකුගේ මැවීමක ප්‍රතිඵලයක්‌ ලෙසිනි.

 
II හින්දු ආගම

 
වෛදික සංස්‌කෘතියට අනුව මිනිසාගේ ප්‍රභවය සිදුවන්නේ මහා බ්‍රහ්මයා ගෙනි. මනුස්‌මෘතිය නම් වෛදික ග්‍රන්ථයේ සත්වයාගේ උපත පිළිබඳව පෙන්වා දෙයි.
බ්‍රාහ්මණෝස්‍ය මුඛමාසීත් 
බාහු රාජන්‍යඃ කෘතඃ 
ඌරු තදස්‍ය යද් වෛශ්‍යඃ 
පද්භ්‍යාං ශුදො අජායත
ඒ අනුව මහා බ්‍රහ්මයාගේ මුඛයෙන් බ්‍රාහ්මනයන්ද, බාහුවෙන් ක්‌ෂත්‍රීයයන්ද, කලවා පෙදෙසින් වෛශ්‍යයන්ද, යටි පතුලෙන් ශුද්‍රයන්ද උපත සිදුව තිබේ.

 
III බෞද්ධ දර්ශනය

 
බෞද්ධ දර්ශනයේදී මිහිතලයේ ජීවයේ උපත පිළිබඳව යම් ස්‌ථානයන්හි කරුණු අනාවරණය වේ. බුදුරජාණන් වහන්සේ පෙන්වාදෙන අන්දමට අග්ගඤ්ඤ සූත්‍රයේදී ඉදිරිපත් කරනුයේ ආබස්‌වර නමැති බ්‍රහ්මලොවින් පැමිණ මිහිතපයේ ජීවය ප්‍රභවය ලද බවය. තවදුරටත් කරුණු ගෙනහැර දක්‌වන උන්වහන්සේ අපගේ ශරීරයද මෙම ලෝකයද ආපෝ, තේජෝ, වායෝ, පඨවි යන පදාර්ත ශක්‌තීන්ගෙන් නිර්මාණය වී ඇති බවද පෙන්වා දෙයි. 


සත්ත්වයන් මෙලොව එළිය දකින ක්‍රම හතරක්‌ පිළිබඳව බෞද්ධ දර්ශනයේදී විග්‍රහ කරයි. අණ්‌ඩජ, ජලාබුජ, සංසේදජ, ඕපපාතික යනු එම ක්‍රම හතරයි.
 
මානව පරිණාමය පිළිබඳ නූතන මත

 
I ජීන් බැප්ටිස්‌ට්‌ ඩිලැමක්‌ - (Jean Baptistede Lamark)

 
ලැමාක්‌ විසින් ඉදිරිපත් කරන ලද වාදය ලැමාක්‌ වාදය (Lamark Theory) පරිචිත ලක්‍ෂණ උරුමවීමේ වාදය, වහර අවහර වාදය යන නම්වලින් හැඳින්වේ.

 
මෙම වාදයෙන් සතුන්ගේ ස්‌වරූපය හා සංවිධානය කෙරෙහි පරිසරය බලපාන බව කියෑවේ. හොඳින් ක්‍රියාකරන අවයව ශක්‌තිමත්ව සීග්‍රයෙන් වර්ධනය වී විශාලවන අතරම භාවිත නොකරන අවයව දුර්වල වී අවසානයේදී නැතිවී යන බව ලැමාක්‌ පෙන්වා දෙයි. පරිසරයේ බලපෑම්වලට අනුව දිගු කලක්‌ කිසියම් අවයවයක්‌ භාවිත කරයි නම් හෝ නොකරයි නම් හෝ ජීවීන් තුළින් පෙන්වන ලක්‍ෂණ එම ජීවීන්ගේ ප්‍රජනනයෙන් පසු බිහිවන ජීවීන්ටද උරුම වේ. මේ ආකාරයට දිගු කලක්‌ උරුම වන ලක්‍ෂණ හෙවත් පරිත ලක්‍ෂණ පරපුරෙන් පරපුරට උරුම වී මුල්ම ජීවීන්ට වඩා හාත්පසින්ම වෙනස්‌ වූ ජීවීන් විශේෂයක්‌ බිහිවේ.

 
II චාල්ස්‌ රොබට්‌ ඩාවින් Charls Robert Darwin

 
මානව පරිණාමවාදයේ පියා ලෙසින් සැලකෙන්නේ චාල්ස්‌ ඩාවින්ය. ඔහු 1809 පෙබරවාරි 11 වැනි දින එංගලන්තයේ ෆ්රූශ්බරි පුරවරයේදී උපත ලැබීය. එහි ප්‍රාථමික පාසලකින් මුල් අධ්‍යාපනය ලැබූ ඩාවින් රසායන විද්‍යාව හා ජීව විද්‍යාව කෙරෙහි වඩාත් උනන්දුවක්‌ දැක්‌වීය. ඒ පිළිබඳ නොයෙක්‌ පර්යේෂණයන්හිද නිරත විය.

 
1825 දී හෙතෙම එඩින්බර්ග් විශ්වවිද්‍යාලයට ඇතුළු වී ජීව විද්‍යාව හැදැරුවේය. 1836 දී කපිතාන් කිං නමැත්තකු විසින් දියක්‌ කළ බීගල් නාවික සංචාරක කණ්‌ඩායම සමග දේශ ගවේෂණයකට ඩාවින් සහභාගි විය. ඔහු බීගල් නාවික කණ්‌ඩායමේ භාරව යැමට සිදුවිය. 1831 දෙසැම්බර් 27 වැනි දින ඩාවින් බීගල් නාවික කණ්‌ඩායමේ ප්‍රධානියා ලෙස දකුණු ඇමරිකානු වෙරළෙහි දීර්ඝත්වය දැන ගැනීම උදෙසා පිටත්ව ගියේය. නැව බ්‍රසීල වෙරළට සේන්දු වූ විට ප්‍රීතියෙන් පිනාගිය ඩාවින් එහි වූ අශ්ව දත්, ඇටකටු, සත්තු, කුරුලු, ඇටසැකිලි ආදිය එක්‌රැස්‌ කළේය. අනතුරුව ගලාපගොස්‌ දූපත වෙත පිවිසුනහ. එම දූපතේ වෙසෙන ෆින්ඩ් නම් කුඩා පක්‍ෂි විශේෂයක්‌ පිළිබඳව ඩාවින්ගේ අවධානය යොමුවිය. එක්‌ දූපතක සිටි ෆින්ඩ් පක්‍ෂීන් අන් සෑම කොදෙව්වකම විසුවනට වඩා වෙනස්‌ බව ඩාවින් අධ්‍යයන කළේය. එකම ප්‍රදේශයක වෙසෙන එකම වර්ගයේ පක්‍ෂීන් අතර මෙවැනි වෙනසක්‌ ඇතිවූයේ කෙසේද යන්න ඔහු සොයා බැලීය.

 
දිගු කලක්‌ හුදෙකාව හැඩ ගැසීමේදී එක්‌ විශේෂයකට වඩා අනිත් විශේෂයෙහි සූක්‍ෂම වෙනස්‌කම් පහළ වන්නට ඇතැයි ඩාවින්ගේ උපකල්පනය විය. වාඩින් සිය සමුද්‍ර චාරිකාව අවසන් කොට 1836 දී එංගලන්තයට පැමිණ එක්‌රැස්‌කොටගත් දත්තයන් විශ්ලේෂණය කරමින් ඔහුගේ මතවාදය ගොඩවගන්නට විණි. ශාක හා සත්ත්ව සංතතියේ පැවැත්ම පිළිබඳ නව මතයක්‌ පළකරන ජීවීන්ගේ සම්භවය (The origin of Species by means of Natural Selection) නම් ග්‍රන්ථය 1859 එංගලන්තයේදී ප්‍රකාශයට පත් කළහ. මෙම ග්‍රන්ථයේ බිහිවීමත් සමග කිසියම් දෙවියකු විසින් ලෝකයත් ජීවීනුත් මවන ලදැයි යන බොහෝ විද්වතුන් හා විද්‍යාඥයන් පිළිගෙන තිබූ මතය ඛණ්‌ඩනයට ලක්‌ විය. සත්ත්වයන් හා වෘක්‍ෂලතා ආදිය ලොව පහළ වී ඇත්තේ වසර කෝටි ගණනක්‌ තිස්‌සේ සිදුවූ පරිණාමයකින් බව ඩාවින් ස්‌වකීය කෘතිය හරහා ඉදිරිපත් කළහ. එකම ජීව සෛලයකින් ප්‍රභවය ලද සත්ව හා ශාක ලෝකය පාරිසරික හේතු කරණකොටගෙන ක්‍රමයෙන් වෙනස්‌ වීම් වලට භාජන වූ බව ඩාවින් තම ග්‍රන්ථයෙන් හෙළිදරව් කළේය. ජීවීන්ගේ හා මානවයාගෙ සම්භවය හා පරිණාමය පිළිබඳ අභිනව වාදයක්‌ බිහිකළ චාල්ස්‌ ඩාවින් 1882 අප්‍රේල් 19 දින මිය ගියේය.

 
III ඇල්ෆඩ් රසල් වොලස්‌

 
මලයානු දූපත් පිළිබඳව ජීව විද්‍යාත්මක ගවේෂණයක යෙදුණු ඇල්ෆඩ් රසල් වොලස්‌ ඩාවින්ගේ මතයට සමාන මතයක්‌ දැරූවෙකි. 1858 දී ඩාවින් හා වොලස්‌ විසින් ඒකාබද්ධව ඩාවින් වොලස්‌ වාදය නමින් ඒකාබද්ධ ප්‍රබන්ධයක්‌ ලන්ඩන්හි ලීනියන් සංගමය වෙත ඉදිරිපත් කරන ලදී. මෙහි පරිණාමවාදය පිළිබඳ ප්‍රථම ප්‍රසිද්ධ විවරණය විය.

 
මානව පරිණාමයේ ප්‍රධාන අවධි

 
මානව හා පුරාවිද්‍යාඥයන් සිදුකර ඇති පර්යේෂණවලට අනුව ලැබුණු පොසිල වාර්තා අනුව මානව පරිණාමය ප්‍රධාන අවධි හතරකින් සමන්විත බැව් පෙන්වා දී තිබේ.

 
1. ඔස්‌ට්‍රොලොපිතකස්‌ ඇෆ්රැන්සිස්‌ අවධිය - (Austrolopithecus Afransis Period)

 
I ඔස්‌ට්‍රොලොපිතකස්‌ ඇෆ්රැන්සිස්‌ - (Austrolopithecus Afransis)

 
II ඔස්‌ට්‍රොලොපිතකස්‌ රොබස්‌ටස්‌ - (Austrolopithecus Robustus)

 
III ඔස්‌ට්‍රොලොපිතකස්‌ බොයිසියායි - (Austrolopithecus boiseai)

 
2. හෝමෝ හැබිලිස්‌ අවධිය - (Homo habilis Period)

 
3. හෝමෝ ඉරෙක්‌ටස්‌ අවධිය -(Homo erectus Period)

 
I හෝමෝ ඉරෙක්‌ටස්‌ ජාවා මිනිසා- (Homo erectus Java man)

 
II හෝමෝ ඉරෙක්‌ටස්‌ පීකිං මිනිසා -(Homo erectus Peking man)

 
III හෝමෝ ඉරෙක්‌ටස්‌ හයිඩලබර්ග් මිනිසා -(Homo erectus Hydelburg man)

 
4. හෝමෝ සේපියන් අවධිය - Homo Sepeian Perio


                                                                                    
                                                                                                  - චූලක බණ්ඩාරවත්ත -